THIRRJE PËR BLUZAT E BARDHA: SOLIDARITETI NUK MUND TË MBETET VETËM FJALË!

Mjeku Erion Dasho:

Pas ngjarjeve të fundit në protestën e studentëve në Tiranë, lind një pyetje që duhet t’i bëjmë vetes si profesionistë të shëndetësisë: A mund të qëndrojmë indiferentë kur të rinjtë që kërkojnë të drejtat e tyre përballen me dhunë?Veçanërisht tronditës është rasti i të riut, i cili, sipas pamjeve dhe raportimeve të publikuara, pasi iu thye këmba gjatë ndërhyrjes policore, u tërhoq zvarrë nga efektivët, sikur të ishte një send dhe jo një qenie njerëzore.
Asnjë dëmtim, asnjë protestë dhe asnjë rrethanë nuk e justifikon trajtimin çnjerëzor të një personi. Çdo përdorim i forcës duhet të jetë i ligjshëm, i domosdoshëm dhe proporcional.

Ne jemi profesionistë të shëndetit por edhe zëri i ndërgjegjes, i dinjitetit njerëzor dhe i përgjegjësisë qytetare.

Prandaj, u bëj thirrje kolegëve të mi: Të organizohemi, të bashkohemi dhe ta shprehim solidaritetin tonë me studentët përmes një proteste profesionale, të organizuar dhe në përputhje me ligjin.

Të shqyrtojmë, përmes sindikatave dhe strukturave përfaqësuese, mundësinë e një greve të ligjshme ose të një bojkoti të koordinuar të shërbimeve jo urgjente, duke respektuar detyrimet ligjore për shërbimet jetike, sigurinë e pacientëve dhe ofrimin e kujdesit minimal të detyrueshëm.

Urgjenca, reanimacioni dhe çdo shërbim i domosdoshëm për mbrojtjen e jetës duhet të garantohen. Protesta jonë nuk duhet të bëhet kurrë në kurriz të pacientëve, por as përgjegjësia jonë profesionale nuk duhet të përdoret si arsye për të heshtur përballë padrejtësisë.

Nuk po bëjmë thirrje për braktisjen e pacientëve. Po bëjmë thirrje për organizim, unitet dhe një qëndrim të qartë qytetar, brenda kufijve të ligjit.

Nëse studentët janë zëri që kërkon ndryshim, bluzat e bardha mund të jenë zëri që kërkon përgjegjësi.

Mos prisni që padrejtësia të trokasë në derën tuaj për të reaguar. Sot janë studentët. Nesër mund të jetë kushdo prej nesh.

Të heshtësh është zgjedhje. Të solidarizohesh është përgjegjësi.