Pamjet e rënda të 19-vjeçarit me këmbë të dëmtuar, i cili u tërhoq zvarrë nga efektivët e policisë pranë Parlamentit gjatë protestës në Tiranë, kanë sjellë pezullimin e pesë punonjësve të policisë, përfshirë edhe shefin e Rendit në Komisariatin Nr. 1.

Videoja, e publikuar më herët edhe nga ne, ngjalli reagime të shumta për mënyrën se si u trajtua i riu, i cili kishte nevojë për ndihmë mjekësore.

Pas publikimit të pamjeve, pesë punonjësit janë pezulluar nga detyra. Bëhet fjalë për katër efektivë dhe shefin e Rendit në Komisariatin Nr. 1, nënkomisar F. K. Ndaj tyre ka nisur edhe një hetim disiplinor.

Për rastin po hetojnë gjithashtu Agjencia e Mbikëqyrjes Policore dhe Prokuroria, me qëllim sqarimin e plotë të rrethanave dhe përcaktimin e përgjegjësive.

Pezullimi i pesë punonjësve vjen pas publikimit të pamjeve që ngritën pikëpyetje serioze mbi mënyrën e trajtimit të një të riu të dëmtuar gjatë protestës. Tashmë pritet që hetimet të zbardhin atë që ndodhi dhe të përcaktojnë nëse janë shkelur procedurat dhe ligji.

Uniforma e policisë mbart përgjegjësi të veçantë në raport me qytetarët. Edhe në kushtet e një proteste të tensionuar, trajtimi i një personi të dëmtuar dhe respektimi i dinjitetit të tij janë detyrime që nuk mund të anashkalohen.