Të paktën 12 të vrarë dhe mbi 300 të plagosur në aeroportin e Riadit në Arabinë Saudite.

Një sulm shumë i rëndë vdekjeprurës ka ndodhur gjatë natës së kaluar në aeroportin “King Khalid” në Riad, kryeqytetin e Arabisë Saudite, që mund t’i japë një dimension të ri konflikteve në këtë rajon.

Gjatë sulmeve janë vrarë të paktën 12 persona dhe janë plagosur 309 të tjerë, disa prej të cilëve ndodhen në gjendje kritike.

Sipas autoriteteve saudite, mes të vrarëve janë katër shtetas sauditë, dy nga Bangladeshi, si dhe nga një person nga Shtetet e Bashkuara, Egjipti, Jordania, Siria, Sudani dhe territoret palestineze. Dëshmitarët thanë se një raketë goditi terminalin e fluturimeve të brendshme, duke shkaktuar panik dhe kaos mes pasagjerëve.

Koalicioni ushtarak i udhëhequr nga Arabia Saudite fajësoi për sulmin milicinë Huthi të Jemenit, e cila mbështetet nga Irani, dhe e cilësoi ngjarjen si një “krim lufte”. Por deri tani nuk ka konfirmim zyrtar nëse Huthit vërtet qëndrojnë pas këtij sulmi.
Gjermania, Spanja dhe Kanadaja u bënë thirrje menjëherë shtetasve të tyre të shmangin përdorimin e aeroportit për shkak të rrezikut të sulmeve të tjera dhe ndërprerjeve në trafikun ajror.

Ndërkohë, Presidenti amerikan Donald Trump tha se administrata e tij po shqyrton mundësinë e mbështetjes së Arabisë Saudite. Uashingtoni deri më tani kishte refuzuar kërkesat saudite për mbështetje ushtarake, por mbetet të shihet cila do të jetë përgjigja përfunditmare e Trumpit.

Milicia Huthi ka intensifikuar së fundi sulmet me raketa dhe dronë ndaj objektivave saudite, ndërsa konflikti në Jemen vazhdon të përshkallëzohet.

Huthit kontrollojnë pjesë të mëdha të vendit, përfshirë kryeqytetin Sana, si dhe zona strategjike përgjatë ngushticës së rëndësishme Bab al-Mandab.