Rama kërcënon jetimët me heqjen e bursave’, pedagogu: Policia mbron pushtetin, jo qytetarët

ftuar në emisionin ‘Kafe Shqeto’ në Syri TV, pedagogu Gjok Vuksani ka akuzuar kryeministrin Edi Rama për gjuhën fyese ndaj studentëve protestues dhe kërcënimet për heqjen e bursave.

Vuksani deklaroi se bursat nuk janë një favor i kryeministrit, por jepen mbi bazën e kritereve të përcaktuara, për të mbështetur studentët në vështirësi ekonomike dhe ata që ndjekin degët prioritare.

Ai e cilësoi dhunën policore si tejkalim të ligjit dhe duke paralajmëruar për pasojat e rënda psikologjike që mund të lërë te të rinjtë

Pedagogu tha se qeveria po dështon në garantimin e sigurisë dhe mbrojtjen e institucioneve, ndërsa protesta studentore përbën një nga momentet më të rëndësishme në historinë e arsimit të lartë shqiptar.

Pjesë nga intervista:

Mund të them që sindikata e pedagogëve është pak e vonuar. Reagimi i saj mund të ishte edhe më i hershëm, por ne kemi qenë përditë në shesh me studentët, sepse një nga funksionet bazë të një profesori nuk është vetëm dhënia e njohurive teorike apo profesionale. Në njëfarë mënyre, është një lloj raporti që krijohet me studentin, është një lloj guide që shërben profesori për studentët. Mentorship-in e kanë shumë të bukur anglosaksonët, mentor, pra që e formon në njëfarë mënyre karakterin e tij, këmbënguljen e tij shkencore e kështu me radhë.

Kështu që unë kam qenë vazhdimisht në protestë dhe mendoj që është një nga momentet më historike të zhvillimit të arsimit shqiptar dhe arsimit të lartë në veçanti.

Unë kam pasur fatin e mirë të jem edhe student i lëvizjes studentore të dhjetorit 1990-1991.

Na ra kjo fatkeqësi dhe u pamë, dhe tani po shohim një ngjarje tjetër, ku studentët tanë, me shumë këmbëngulje, me shumë trimëri, me shumë vetëflijim, mund të them, ata po përballen me një polici fare të çorientuar, me një polici fare joprofesionale, me një polici të dhunshme.

Ata janë studentë, ata janë formuar për t’u bërë doktorë, inxhinierë, agronomë, veterinerë. Ata nuk janë luftëtarë, ushtarakë. Ata nuk kanë një formim, qoftë fizik, qoftë psikologjik, për t’u përballuar me ushtrinë e policisë.

Nëse, nga ana tjetër, janë ca njerëz të trajnuar, të mbrojtur me skafandra, të pajisur, dhe gjithë jetën e tyre ai është profesioni i tyre, pra të jenë të përgatitur për situata të tilla, që të përballohen me një protestë, dhe ata janë joprofesionistë, janë të dhunshëm, janë në tejkalim total të ligjit, nga ana tjetër janë ca studentë të bukur, të jashtëzakonshëm, që luftojnë për të drejtat e tyre.

Duhet të themi edhe diçka: ai fëmijë 16 vjeç, ai student 17 vjeç, që dhunohet, që dhunohet në furgon, që dhunohet në komisariatet e policisë, për atë është një traumë. Pra, ai përjeton një traumë që do ta mbajë mend dhe do ta ketë me vete, dhe do ta mbartë me vete gjithë jetën.

Pra, shteti shqiptar, policia e shtetit, gjithashtu këtu është, që paguhen me taksat tona. Ata paguhen, ose ata e kanë si funksion kryesor që të dhunojnë studentët, që t’i bëjnë ata me trauma njerëzore gjatë gjithë jetës. Pra, ky është funksioni i saj.

Më duket sikur jemi në një shtet absurd, që kemi kaluar çdo lloj limiti njerëzor dhe normal për të administruar shtetin. Pra, ata mbrojnë Partinë Socialiste dhe nuk mbrojnë bankat, ata mbrojnë Kryeministrinë me forca speciale dhe nuk mbrojnë gjykatën.

Mendoj se kryeministri është jashtë gjendjes së tij normale mendore. Nuk mund t’i konceptoj veprimet e tij: një lloj nxitjeje, një lloj sharjeje. Si mund të thuash ti që studentët janë pa shkollë, nuk bëjnë dot shtatë fjalë bashkë? Si mund të thuash: „Unë do t’ua heq bursat studentëve“? Bursat e studentëve nuk i jep Edi Rama, jepen mbi bazën e disa kritereve. Për shembull, një jetim që nuk ka nënë e baba, që s’ka të ardhura, merr bursë. Pra, Edi Rama do t’ua heqë bursën jetimëve.

Një student tjetër që s’ka të ardhura merr bursë, sepse këto janë kriteret që i përcaktohen. Ne kemi studime prioritare, pra ai student që vazhdon për agronomi ose veterinari, pra degë prioritare, që e ka përcaktuar me vendim të Këshillit të Ministrave që një student i tillë duhet të mbështetet, jo për hatër të qeverisë dhe kryeministrit, por për interesat e ekonomisë kombëtare.

Jemi në një sistem absurd dhe, si të thuash, dirigjenti i këtij sistemi është kryeministri. Prandaj, unë po dyshoj se çfarë po ndodh me këtë njeri